#منقول عن الراحل الجميل #احمد_مدحت رحمة الله عليه..
"في الفترة الأخيرة، ردود أفعالي تجاه اللي حواليا بقت أهدى بكتير جدًا، عِتابي قلّ بعد ما اكتشفت إني ضيَّعت طاقة ووقت كتير جدًا في محاولة عتاب ناس مبيفرقش معاهم العتاب أساسًا وبيشوفوه "وجع دماغ"، بقيت بتعامل بمنطق التجنُّب والاستبعاد؛ يعني فُلان قدملي رد فعل سخيف على لحظة شافني فيها ضعيف ومحترمش ده بشكل مُرضي ليا، بقرر إني عمري ما هظهر ضعفي قصاده تاني..
فُلان محترمش سؤالي عنه ورغبتي في وده، واتعامل مع ده باستهتار، بأبطل أسأل عنه وبريح بالي من وجع القلب، حسيت إن وجودي بقى تقيل على شخص ما، حتى لو بحبه، بخف وجودي وأسيبه هو يبادر لو حابب يسترجع وجودي بشكله القديم المُكثَّف؛ يمكن كل ده بدأ مع قناعات بتتأكد جوايا إني مُكرَّم جدًا عند اللي خلقني، وحياتي أغلى وأهم من إنها تضيع في الحُزن على حاجات وناس ميستحقوش الزعل، ما هو حتى الزعل غالي، مينفعش يتقدم كده عشان أي حاجة أو أي شخص.."
علشان كده دايما بنقول
العتاب للأحباب .. مش لأي حد غاب..
#المايسترو